शिक्षक मागणीसाठी नागेवाडीत शाळेला ठोकले टाळे

दोन शिक्षक असलेल्या शाळेतील एक शिक्षक कायम गैरहजर तर दुसरा शासकीय कामात व्यस्त या प्रकाराला वैतागून शुक्रवारी (दि २६) नागेवाडी (ता तासगाव) येथील पालक आणि ग्रामस्थांनी शाळेला टाळे ठोकले. तीन तास विद्यार्थी शाळेच्या दारात बसले आहे हे कळल्यानंतर तहसिलदार रविंद्र रांजणे यांनी सोमवारी शाळेला शिक्षक मिळवून देण्याची ग्वाही दिली. यानंतर कुलुप काढून वर्ग सुरु करण्यात आले.
नागेवाडी येथील जिल्हा परिषद शाळेचे पहिली ते चवथीचे वर्ग भरतात. शाळेत २४ मुले-मुली असून दोन शिक्षक आहेत. गेल्या शैक्षणिक वर्षात दोनपैकी एक शिक्षक सतत गैरहजर होते. यंदा शाळा सुरु झालेपासूनही एकच शिक्षक हजर असतात. तर दुस-या शिक्षकांनी स्वेच्छा निवृत्तीसाठी अर्ज केला असल्याचे शिक्षण विभागाकडून सांगितले जाते.
गुरुवारी दिवसभर शिक्षकाविना शाळा सुरु होती. याबाबत विचारणा केली असता प्रशासकीय कामासाठी शिक्षक तासगावात होते असे सांगण्यात आले. मगं वैतागलेल्या पालक आणि ग्रामस्थांनी शाळेच्या गेटलाच कुलूप लावले. याची माहिती शिक्षक सचिन वाकडे यांनी शिक्षण विभागाला दिली.