विजया पाटील यांच्या प्रचाराला जोर ; वंचित-स्वाभिमानी आघाडीची लाट अधिक धगधगती महिलांचा उत्स्फूर्त प्रतिसाद
प्रभाग ६ मधील तळागाळातील जनसंपर्क मोहीम प्रभावी ठरते
तासगाव : रोखठोक न्यूज
तासगाव नगरपरिषद निवडणुकीत वंचित बहुजन आघाडी आणि स्वाभिमानी विकास आघाडीने उभारलेले संयुक्त पॅनल दिवसेंदिवस जनमत आकर्षित करत आहे. विशेषतः नगराध्यक्ष पदाच्या उमेदवार विजया बाबासाहेब पाटील यांच्या प्रचाराला मिळणारा उत्स्फूर्त प्रतिसाद आता स्थानिक राजकारणात नवीन समीकरणांची चाहूल देऊ लागला आहे.
सोमवारी प्रभाग क्रमांक ६ मधील माळी गल्ली, मुस्लिम मोहल्ला या परिसरात झालेल्या प्रचारफेरीत महिलांचा आणि युवकांचा मोठा सहभाग पाहायला मिळाला. विजया पाटील यांच्या शांत, सौम्य पण निर्णायक नेतृत्वशैलीबद्दल मतदारांनी सकारात्मक भूमिका दर्शवली. घराघरांत जाऊन झालेल्या संवादात स्थानिक प्रश्न, पाणीपुरवठा, रस्ते-विकास आणि सामाजिक समावेशकतेच्या मुद्द्यांवर त्यांना चांगला प्रतिसाद मिळाला.
प्रभाग ६ चे उमेदवार सद्दाम मोमीन आणि माया संतोष रसाळ यांनी क्षेत्रातील प्रलंबित प्रश्नांवर ठोस भूमिका मांडत मतदारांचा विश्वास कमावला. स्थानिक नागरिकांनी “बदल हवा आहे, पण तो विकासाभिमुख असावा” असा सूर व्यक्त करत आघाडीच्या उमेदवारांना सक्रीय पाठिंबा दर्शवला.
या प्रचारसोहळ्यात माजी खासदार संजयकाका पाटील आणि प्रभाकरबाबा यांच्या उपस्थितीने ऊर्जा वाढली. दोघांनीही रात्री उशिरापर्यंत जनसंपर्क साधत विजया पाटील यांच्या उमेदवारीला बळ दिले.
तासगावात आता “संयुक्त आघाडीची लाट” असल्याचे कार्यकर्त्यांचे म्हणणे असून, प्रभाग ६ मधील उत्स्फूर्त वातावरण पाहता विजया पाटील यांच्या बाजूने राजकीय समीकरणे झुकत असल्याचे जाणवू लागले आहे.
